قصيدة زجلية للزجال والشاعر “محمد لمسيّح أبو سارة”

لهيه… البياض

يراري بالصمت

حتى يديه نعاسو

 

ولهيه..

نذبة.. جنب الكتبة

كِ شي واد

فگعان من راسو

 

وانا هنا

ساهي ف الدخان

الخارج بين صبعاني

و ماناش بيكاسو

 

ماناش أنا

وماناش الريح

اللي دق على بابي

و خلى النقرة

فين يدگ نحاسو

 

شكون فينا

يوشم حروف الزين

على جبين ذاك البياض

وشكون فينا

سباب ذيك النذبة

اللي تبَرّى منها المداد

 

ماناش أنا…

أنا عَ كنجمع شي حليمات

ونصبغهم بحروف الگانة

حيث الولف فيَ شاخر

ماناش

اللي قرقب سوارت الرباح

ف الزريبة

ماناش

اللي كان للوهم برّاح

وسط السيبة

أنا عَ إنسان

… إلى إشعار آخر .

….

م. ل. أبو سارة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى